سلما بند #لېکنه Lal Zazai

د یاد بند اهمیت

١- په کلني ډول د ٤٢ مېګاواټو د برېښنا د تولید ظرفیت لري.

٢- د ٧٥ زرو هکټاره ځمکې د ضرورت وړ اوبو ظرفیت لري.

٣- ٣٠٠ ملیون ډالر مصرف پرې راغلی چې ټول یې هند ورکړ. Thank you India

٤- تازه څو ورځې وړاندې یې دریم توربین هم فعال شو.

٥- په یاد بند مو له ١٩٧٦ کال راهیسې بې شمېره شهېدان ورکړي چې ترډېره بریده د جګړو مالي ملاتړ کوونکی ایران و اما پاکستان هم د هند سره د قاتل رقابت له وجې امنیتي ستونزې جوړې کړې وي. پاکستان د دې لپاره دا کار کوو چې د هند او افغانستان ترمنځ د دوستۍ اړېکې نوره هم پراخې نشي او ایران بیا د مفته او زیاتو اوبو د ترلاسه کولو لپاره هر وخت جګړه مارې ډلې حمایه کولې. د دواړو هېوادونو بل مشترک هدف د پاکستاني او ایراني توکو لپاره د افغانستان مصرفي مارکېټ پاتې کېدل و.

--------------------

د سلما بند د پیل او جریان وخت:

د سلما بند د ظاهرشاه په وخت کې طرح او د داوود خان او ببرک کارمل په وخت کې تر تعقیب او عملي پړاو لاندې ونېول شو. د داوود خان په وخت کې یې ٢٥% کار بشپړ اما وروسته د جګړو له کبله یې کارونه په ١٣٥٧ کې په ټپه ودرېدل. د کارونو د پیل لپاره په ١٣٧٦ کې یې یوځل د بنسټ ډبره کېښودل شوه او بلاخره د جګړو له کبله چې زموږ زیات شمېر خلک پکې شهېدان شول د یاد بند کارونه بیا له ستونزو سره مخ شول خو بلاخره په ١٣٩٥ کال کې د ډاکټر اشرف غني احمدزي په وخت کې د هند صدراعظم نارندرا مودي په شتون کې ګټې اخېستنې ته وسپارل شو.

د سلما بند او هرېرود سیند موقعیت

د سلما بند د هرات ولایت شمال ختیځ کې د هرېرود سیند په اوږدو کې د چشت ولسوالی د سلما په سېمه کې موقعیت لري. د هرېرود سیند د بابا د غرونو څخه سرچېنه اخلي او د غور ولایت دننه لویه لاره وهي; کله چې له چغچران تېر شي نو بلاخره هرات ته رسېږي. د هرېرود سیند د افغانستان او اېران ترمنځ ٦٠ کېلومټره سرحد په بر کې نیسي. مهمه دا چې متاسفانه د هرېرود اوبه چې چې اوږدوالی یې ١١٢٤ کېلومټره دی چې ٦٠٠ کېلومټره د هېواد بهر او نور دننه موقعیت لري د ترکمنستان او اېران لخوا یې اوبه استفاده کېږي. ترکمنستان پرې خپلې جنوبي سېمې د څراغ غوندې روښانه کړي(د ترکمنستان تجن سیند مهمه برخه) او په یوې برخې یې د ترکمنستان او ایران لخوا په ګډه د دوستۍ بند د ٤ ملیارده ډالر په ارزښت پرې جوړ شو او خپلې ځمکې یې پرې شنې ساتلي دي. وروسته له هغې چې د سلما بند افتتاح شو د اېران او ترکمنستان عکس العملونه رامنځته شول او حتی اېران د ساز په نړېوالې محکمې کې شکایت وکړ خو دا چې موږ پرې وړاندې او مخکې پانګونه کړې وه، د اېران دعوه غلطه ثابته شوه.

----------

اوس پوښتنه داده چې د سلما بند اوبو نه تراوسه سمه استفاده ولې نده شوې؟

ا.ا.ا اړوند مسولې ادارې تازه پرېکړه کړې چې موږ به د څو ولسوالیو مشرانو سره کېنو څو دوی ته د کاسې اوبه ورخوشې کړو.

نو خدای دې وکړي چې، عملا ځمکې خړوبې شي او د کانالونو چارې یې پیل شي.

--------------------

وړاندیز دا دی چې

١- ایران به هر وخت هڅه کوي څو په لویدیځو ولایتونو کې جګړې رامنځته کړي د دې لپاره چې د هلمند او هریرود سیتد موفته اوبه هر وخت او بې حده ریاتې ترلاسه کړي. نو ا.ا.ا ته پکار دي چې هر وخت یادو تهدیدونو او ناامنیو ته پوره چمتوالی ولري او د دوست په جامه کې مو ونه غولوي.

٢- د کانالونو چارې زر پیل شي څو ځمکې خړوبه، اوبه مدېریت، زراعت او محصولا زیات، کاري فرصتونه اېجاد او برېښنا تولید شي.

٣- د اوبو جنګ احتمالات ورځ په ورځ زیاتیږې او راتلونکې کلونه به افغانستان نور هم له زیاتو چلینجونو سره لاس اوګرېوان وي، نو ځکه د سالم، مسلکي او ځواب ویونکي پروسې وړاندیز کوم څو سالم وساتل شو او د اوبو مدېریت مو په سمه توګه ترسره شي. د اوبو ستونزه په نړېواله کچه مخ پر زیاتېده ده.

لېکوال: Lal Zazai لعل ځاځی

اپریل ١١ کال ٢٠٢٢/ حمل(وری) ٢٢ کال ١٤٠١

دوشنبه

وخت ٧:٥١ p.m

کابل-افغانستان

0 Comment

Related Articles

Related Articles

0 Comment