وارداتي هېواد او بدیل(ا.ا.ا لپاره غټ خنډ او حللارې)

Lal Zazai

افغانستان د ایراني، پاکستاني، چینایي، او د منځنۍ آسیا د توکو او اجناسو په مهم استهلاکي(مصرفي) بازار باندې بدل شوی دی. متاسفانه جګړې زموږ زېربنایي تاسېسات له منځه یوړل، داخلي صنعت او تولېداتو کې مو کموالی راغۍ، همسایه هېوادونو موږ ته روغه ورځ نه غوښته او بلاخره په بهرنۍ(باندنۍ) سوداګرۍ باندې اتکا ته اړ شوي یو او د سوداګرۍ دوران او یا د تادیاتو بېلانسو مو په یو لوی او خواشېنوونکې کسر کې قرار لري.

زموږ دا ډول حالت له تاوان پرته ګټه هېڅ نشي درلودلای او حالت مو هره ورځ بدتر کېدلای شي ځکه چې له افغانستان څخه نغدي پیسې یا پانګه لېږدول کېږي او افغانستان کومه داسې عایداتي سرچېنه نلري چې دغه ثروت بهېدنه جبران کړي.

کچېرې موږ او تاسو د تادیاتو بېلانس ته وګورو، نو متوجه به شو چې بهرنیو مرستو زموږ هېواد د یو کاذب اقتصاد په توګه رانېولی و. %٩٠ واردات او %١٠ صادرات د یو کاذب اقتصاد ښودنه کوي او د دې لپاره چې موږ دغه %٩٠ وارداتو لپاره اسعار ولرو تر ډېره برېده بهرنیو مرستو دغه خالېګا ډکه کړې وه. دا پدې معنا چې کچېرې موږ ٧٠٠ ملیون ډالره صادرات لرو او ٧ ملیارد ډالر واردات، نو موږ باید یادو وارداتو ته پانګه ولرو څو دغه کسر له منځه یوړل شي. نو په تېرې دورې کې دغه خالېګاه بهرنیو مرستو ډکه کړې وه اما لدې وروسته به د ا.ا.ا له یو لوی خنډ او چلېنج سره مخ وي ځکه بهرنۍ مرستې ممکن نور ورنکول شي.

--------------------

نو ا.ا.ا یوازېنۍ حللاره چې لري د دې لپاره چې د مرستو تشه ډکه کړي، د کاذب پر ځای ځان بسیا اقتصاد ولرو، د هېوادونو له سیاسي، امنیتي او اقتصادي نفوذ څخه خلاصون ومومو هغه دا ده چې،

١- داخلي او بهرني پانګوال په افغانستان کې د پانګونې لپاره جذب کړي.

٣- د خفېفه صنایعو په برخه کې لنډمهالې فابرېکې تاسیس شي.

٣- زراعت برخې ته پراختیا ورکړي ځکه افغانستان یو زراعتي هېواد دی.

٤- اوبه مدېریت کړي د دې لپاره چې برېښنا تولید او ځمکې خړوبه شي. (د قوشتېپې کانال، د کمال خان بند کانالونه، او د نورو بندونو جوړول)

٥- د کانونو په مسلکي استخراج پیل وکړي.(په تېرو ٥ ورځو کې مو د ٥٣٨ ملیونو افغانېو عواید لدې برخې درلودل)

٦- له خپل مهم جغرافیایي موقعیت څخه استفاده وکړي.(د افغانستان دوامداره، اساسي او نه مصرف کېدونکی عایداتي منبعه)

٧- اقتصاد محوره سیاست غوره او د سېمې او نورو هېوادونو سره نېکې اړېکې تامین کړي.(د بهرني سیاست توازن ساتل)

٨- په کابېنې کې مسلکي او ژمن کسان موجود وي.

٩- سېمه ییزو پروژو په تطبیق کې مهمه ونډه واخلي او پدې برخه کې د هر ډول اسانتیا رامنځته کولو ژمنتیا پکار ده.(ټاپي، ټاپ، کاسازر، یو کمربند یو لار، سپیک، اوسنې پټلې پروژې...)

١٠- د حېواناتو په روزنه او د لبنیاتو په تولید کې پروژې ترکار لاندې ونېول شي.

--------------------

ترڅو چې موږ د اوس غوندې په بهرنيو توکو متکي و، د پرمختګ خوبونه هېر کړﺉ اما کچېرته د پورته وړاندېزونو په تطبیق باندې کار وشي، افغانستان به پر یو خودکفا(پر ځان بسیا) هېواد بدل شي او له هرډول نفوذ به په امن کې وي.

لېکوال: Lal Zazai لعل ځاځی

اپریل ١٨ کال ٢٠٢٢/ حمل(ورۍ)٢٩ کال ١٤٠١

دوشنبه

وخت ١١:٢٣

کابل-افغانستان

0 Comment

0 Comment